О-хьэ-хьайкIи хьамыржъэкъу,
Хьамыржъэкъомэ янахьыжъ,
Ишкончыжъ ерэжъыу.
Стамбыл Шэуджэн
ШэкIоныр къызхафэм
ЛэучэцIэу зэхэзыхыгъэмэ
Шъхьандэхэм зыкъуадзэжьыгъ.
Лэулэшъэныр къыздрихьыжьи,
ХьадэIусыр къыдрекIуи,
Зырызыгъэ къыхафи,
Зы шъотабжъэ къашIуришъуи
Къежьэжьи, къэкIожь пэтзэ,
Ш1уцIэгъакIэ горэ ылъэгъугъ
Орыжъыбгъур ыцIэу.
Макъэ ришъи,
Орыжъыбгъур къыригъэшъи,
Чъыгыжъае дигъэчъаи,
ЫлъакъокIэ кIаIи
КIиутэу хигъэфагъ.
Нэтыжъые фэдэу ыIуи
ЫIибы къыриупцIэкIи, къежьэжьи,
КъэкIожь пэтгозэ,
Хьатыхъущыкъо къыIукIагъ.

– Сыд мы къэпхьырэр, шъыу? – ри1уагъ.
–    Мэзчэтыуба, шъыу, – ыIуагъ.
–    Уятэпс, – ыIуагъ, – мэзчэтыумэ ар,

Гъыщмэ ячэтыужъ нахь.

– Алахьэми сырихьакI,

ЦIыфыми сырякIас,
Чэтыу лъэуаси сфэшъутыжьи,
Фитэу хэгъэгум сыкъижъугъэнэжь, – ыIуагъ.

– Алахьэми урихьакI,

ЦIыфыми урякIас,
Чэтыу лъэуаси фэттыни,
Хэгъэгуми фитэу укъидгъэнэжьын, – аIо пэтгозэ,
АпшIэдэрэ пэтынха?
Гъыщхэр къэсыгъэх.
КIакор аубгъуи,
БгъурыбгъуиплIыкIэ къетIысэкIхи,
Сомэ шъибгъукIэ паупкIыгъ.

– Гъыщым ыгъотмэ ерэхь, – аIуагъ, –
Ымыхьмэ тихьэрам.

– Алахьэу мы зытхылъ сыфэмый,

Сихьэдашъхьэ сыфай.
ЗыукIыгъэм ышъхьэкIэ сыфай нахь.
Адэ зы Абыдэ кIалэ горэ щысти,
Непэ Абыдэмэ тызыбжъакъу,
Тыбжъэкъозэш,
Тищыгъу-пIастэ зы.
Бэу зиIэм бэу икIуачI,
МакIэу зиIэм макIэу икIуачI
Сэ сикIуачIэр ар зы.
Непэ зы пшъэшъэ щыс горэ сиIэти,
Зы хэхэс горэм естыгъ, – ыIуагъ.
Зы пкIэгъолэжъ къыситыгъ,
Сомэ шъибгъу икъугъ.
Ар зы Абыдэм къышъосэты, – ыIуагъ.
Гъыщым ыгъотмэ ерэхьи,
Ымыхьмэ тихьэрам.
Алахьэу мы зытхылъ сыфэмый,
Сихьэдашъхьэ сыфай
ЗыукIыгъэм ышъхьэкIэ сыфай нахь.
Ади зы Абыдэ кIалэ щысти,

– Абыдэмэ тызыбжъакъу,

Тыбжъэкъозэш,
Тищыгъу-пIастэ зы.
Бэу зиIэм бэу икIуачI,
МакIэу зиIэм макIэу икIуачI,
Сэ сикIуачIэр ар зы.
Непэ зы нэбгырэибын сиI
Сянэ-сятэм згъэкIодынэу къысамыIуагъэу
ЗгъэкIодын сыгу хэмылъыгъэу сиIэзы,
Абыдэм къышъосэты, – ыIуагъ.

– Гъыщым ыгъотмэ ерэхь,

Ымыхьмэ тихьэрам.

– Алахьэу мы зытхылъ сыфэмый,

ЗыукIыгъэм ышъхьэкIэ сыфае нахь.
Адэ зы Абыдэ кIалэ горэ щысти къэгубжи,

– Сыд къэхъугъэр шъыу!

АукIыгъэмэ аукIыгъэр зы чэтыужъ,
ЗыукIыгъэмэ зыукIыгъэр тикIалэ.
Неущ алахьэр зымыгъэпцIырэр
Къырсэикъо ихьакIэщ къерэкIуалI
Шъуигынжъыехэр къыдэшъуути,
Шъуишыныбэпхыхэр къыкIэшъуфарзи,
Жьыбгъэ фарзэ фэдэу,
ИтIонэрэ пчэдыжьым
Ягынжъыехэр къыдаути,
Яшыныбэпхыхэр къыкIафарзи,
Жьыбгъэ фарзэ фэдэу къызекIуалIэхэм,
Зы тутын бэжьакIэ нахь аратыжьыгъэп.