КIЭЛЭЦIЫКIУХЭР

Тыжьын нэфэу,
Огум зэрифэу,
Мазэр жъыоу Iэгум къыздахьэкIэ,
Чэрэз чъыгмэ
Къячъэхэу абгмэ,
Пчыхьэжь Iасэм псымакъэр къызихькIэ;

ЗыгужбуакIэ
Жъгъыутэх мыжъуакIэу,
Пщыщэ пагохэр зыщычъыежьхэкIэ,
Нэпкъ натIэм
Дэнэгъо шхъуантIэу,
Пцел куамэхэр зыщыIэсэжьхэкIэ,
КIэлэцIыкIухэр,
Огу шхъонтIэ сапэр
ПымыкIыжьыгъэу алъапэ,
Батырмэ афэдэу пIэкIормэ,
ПIэкIор инмэ ахэукIораех.

КIэлэцIыкIухэр,
Жъогъо зырызхэр
АIэмычIэкIэ пытэу афызэу,
Батырмэ афэдэу хъоо-пщаоу,
ПкIыхькIи дунаим едаох.

Сыдэу, батырхэп, шъупшъыгъа?
Мыжъоу быоу шъутIупщыгъэм
Огум зыридзагъ жъогъо нэфэу.
Сыдэу джы къэлыдрэ ар чэфэу?

Сыдэу, батырхэр, шъупшъыгъа!
Къакъыр къогъухэмкIэ зыжъугъэбылъыгъэу,
Мэфэ реным шъо шъузэшъуим.
Жьым ыхьыгъэх иныжъэу типыйхэр.

Шъупкъынэ-лынэхэр зэбгырызыгъэхэу,
ШъуIупшIэ цIыкIухэр губжьыпхэу пщыгъэхэу,
ШъузыслъэгъукIэ, сэ сегупшысэ:
Нэф джыри къэшъыщт мыпцIыусэу.

КIэлэцIыкIухэр къыгъэущыщтых,
Алъыхъунхэу яжъогъо шIагъохэм.
КIэлэцIыкIухэр къыгъэущыщтых,
Къачъыхьанхэу япшысэ лъагъохэр.
Къэущыщтых кIэлэцIыкIу шIагъохэр,
КIэлэцIыкIухэу зи зимыдагъохэр,
Саусэрыкъо ылъэгуанджэ аушъэфэу,
Яшъэфи зэраIоу гупсэфэу.
КъашIошIэу: тэдкIи щыогоу,
КъашIошIэу: тэдкIи щыгъогоу,
ЧIыгуми имыIэу гъунэ,
Огури фаем иунэу.

Алъыхъущтых дунэе чыжьэхэм,
ШхъуантIэхэм, дунэе фыжьыхэм.
Къагъотыщт щыIи щымыIи,
ЩымыIи щыIи зыдэщыIэр.

Къэущыщтых, зашIомыцIыкIоу,
Мыжъор быоу атIупщэу,
Инымэ ашIоемыкIоу,
Шъуйхэмэ жьыр къырагъэпщэу.

Гъогум ишхъуантIа лъагъомэ
Бытыры цIыкIухэр алъэгъух,
Мыжъо мыхъунхэу жъуагъохэр -
Мыжъохэр лъагъо орэхъух! 

Къуекъо Налбый

***